NGABANDUNGAN berita dina unggal tivi, kuring mah remen gogodeg. Abong-abong keur kalangan pers mah bad news is good news, berita teh ngeunaan kajadian-kajadian nu goreng patut we. Asa langka teuing berita nu alus ti nagri nu ngaranna Indonesia teh. Mun teu soal korupsi, pasti ngeunaan bencana, karusuhan, bentrok polisi jeung mahasiswa atawa warga, demonstrasi nu anarkis, protes warga, penyuapan, jst. Nu alus bari nonjol mah asa ukur ngeunaan mobil Esemka jeung siswa SMK 2 Banjar nu bisa ngarangkey laptop. Salianti eta mah kagorengan we. Lamun diprosentasikeun antara berita goreng jeung berita alus teh meureun 90 banding 10. Ck, ck, ck...
Diulah-ulah ge kuring mah geus boga kasimpulan: jurnalis televisi danget ieu di urang keur gering. Malah kaasup katagori parna. Coba pikiran ku akal sehat, piraku ti Indonesia berita nu ngadominasina ukur kagorengan? Na geus euweuh kaalusan nu pantes diangkat jadi berita? Prinsip kasaimbangan dina berita lain saukur imbang dina hiji judul berita, tapi oge dina imbang dina jumlah berita. Lamun berita goreng aya lima, berita alus ge kurang leuwih kudu aya sakitu. Lamun terus-terusan kawas ayeuna, jurnalis televisi bisa asup kana jurnalis koneng, koran koneng mun dina media cetak mah. Eusina rereana sensasi wungkul, sampah!
Jurnalis televisi bisa we boga dalih yen berita kitu teh sangkan bangsa urang diajar tina eta kagorengan, sangkan nyaho yen eta kagorengan teh kudu dileungitkeun ti bangsa urang? Hm, sabaraha persen tujuan eta bisa nepi? Nu puguh mah dina otak bangsa Indonesia teh kalah tumuwuh sikep pesimis, nganggap bangsa ieu geus ruksak, loba kagorenganana batan kahadeanana, hese diomeanana. Ibarat cuci otak, hantem-hanteman dijejelan berita goreng, sagala hal oge bakal direspon sacara goreng deui. Lila-lila mah rasa gula oge bakal disebut pait. Sok geura, lamun kuring nyebut kieu: pejabat A anyar meuli mobil. Naon nu kalintas dina otak urang? Pasti kieu: uah, pira ladang korupsi. Padahal can tangtu. Anggapan dina otak urang ayeuna pejabat teh sarua jeung korupsi. Eta teh lantaran ku sering-seringna urang disuguhan berita ngeunaan pejabat nu korupsi. Padahal yakin rea keneh pejabat nu jujur batan nu korupsi.
Can deui anggapan ti bangsa deungeun. Lain beja yen geus rea tatangga nagara urang nu nganggap Indonesia teh teu aman. Rea demo nu anarkis, rea teroris, rea kajahatan. Maranehna apal ti mana atuh ari lain tina berita mah. Tur padahal dina kahirupan sapopoe, kajadian-kajadian negatip teh ukur sabaraha persen tina hal nu positipna. Tapi ku sabab berita nu nonjol ngeunaan kagorengan wungkul, nya nu nepi ka maranehna jeung nu jadi anggapan ngeunaan Indonesia na otak maranehna teh nya nu kitu we.
Kaya kieu mah urang teh keur ngarorocetan beungeut sorangan. Keur neplokan beungeut sorangan ku kokotor. Jurnalis nu kritis lain hartina mere pangaruh ku perspektif jeung prasangka goreng kana sagala hal. Urang butuh jurnalis nu teu sakadar pinter ngungkit-ngungkit kasalahan batur, tapi oge jurnalis nu bisa mere pencerahan, pikagumbaraeun, ngawangun harepan jeung optimisme ngeunaan mangsa nu bakal datang dina ngawangun bangsa ieu.
Di kalangan jurnalis aya perasaan gagah, agul, asa aing, lamun hasil ngabongkar hiji kasus. Tapi ngarasa teu pede lamun ngaberitakeun kasuksesan sasaurang atawa pamarentah, paur disangka jadi corong hiji pihak. Berita kasuksesan mah kalah asup kana adventorial, kudu mayar, embungeun ngamuat kitu-kitu wae. Padahal ulah kitu. Ngaberitakeun nu goreng jeung nu hade, kadarna sarua wae. Tapi memang bisa jadi ngaberitakeun nu goreng mah ngalobakeun musuh, ngaberitakeun nu hade mah ngalobakeun sobat.
Tapi kuring yakin, lila-lila mah masarakat bakal ngarasa bosen kana media nu hantem-hantem ngaberitakeun kagorengan ti bangsa ieu. Hiji waktu mah bakal ditinggalkeun. Lamun kalangan jurnalis mertahankeun sikep saperti ayeuna, propesi jurnalis bakal disapelekeun jeung dimusuhan ku masarakat. Tanda-tanda ka palebah dinya geus aya. Hususna wartawan media cetak di daerah nu teu dibere gajih, pagaweanana ngucik-ngucik kasalahan batur nu diharepkeun nu diucik-ucikna sieuneun tur pada ahirna mere duit. Muncul we istilah wartawan bodrek, wartawan amplop, wartawan CNN (Can Nulis-nulis). Aya nu lucu, hiji koran reporterna di hiji kabupaten mani leuwih ti lima urang, tapi berita ti eta kabupaten nu dimuat teu hiji-hiji acan. Naon garawena eta reporter, padahal ti arapeng kasebutna mah nareangan berita.
Kalangan jurnalis boh tv boh cetak kudu gancang-gancang sadar, ngomean sikep dina nyuguhkeun berita. Ulah ukur resep nembrakeun berita goreng nu akibatna teu hade keur bangsa ieu. Lain ulah diberitakeun. Tapi kudu imbang jeung bener. Henteu propokatif. Kudu mere wawasan nu ngawangun rasa optimis keur mangsa nu bakal datang. Masarakat butuh jurnalis nu mampuh ngawangun citra hade bangsa ieu. Lain nu terus-terusan mepehek. ***
Lembur simpe, 2012
Tidak ada komentar:
Posting Komentar